Sex íslensk mörk hjá AZ

Leikur AZ Alkmaar og VVV Venlo í hollensku úrvalsdeildinni í kvöld mun eiga sinn sess í sögu íslenskrar knattspyrnu. AZ vann leikinn, 6-1, og skoruðu þeir Kolbeinn Sigþórsson og Jóhann Berg Guðmundsson öll mörk sinna manna í leiknum.

Kolbeinn skoraði fimm mörk í leiknum og Jóhann Berg eitt. Báðir eru leikmenn íslenska U-21 landsliðsins sem keppir í úrslitakeppni EM í Danmörku í sumar ásamt sjö öðrum þjóðum.

Kolbeinn hefur nú skorað níu mörk alls í hollensku úrvalsdeildinni í vetur en báðir léku allan leikinn í kvöld. Þetta var fyrsta deildarmark Jóhanns Bergs á tímabilinu.

AZ komst upp í fimmta sæti hollensku úrvalsdeildarinnar með sigrinum en liðið er með 37 stig, sjö stigum frá toppliði PSV Eindhoven.

Þeir félagar hafa spilað reglulega með AZ á tímabilinu en báðir voru teknir inn í aðalliðshópinn í sumar.