Laxveiðin hefst með lúðraþyt í Skotlandi

Laxveiði ársins 2011 er hafin í ánni Helmsdale í Skotlandi. Þar byrjuðu heimamenn og gestir veiðarnir fyrir rúmum tveimur vikum með mikilli viðhöfn.

Meðal boðsgesta við opnunina var laxverndarfrömuðurinn Orri Vigfússon. Áður en veiðarnar hófust skemmtu menn sér árla morguns við hefðbundinn sekkjapípuleik og skoska dansa. Veiðimaðurinn Richard Bain landaði síðan einum níu punda laxi. Telja kunnugir það vita á gott fyrir veiðitímabilið.

Michael Wigan, talsmaður Helmsdale, sagði nokkuð hugrekki þurfa til að veiða í ánni janúar. „En fiskurinn á fyrsta degi sýnir að það borgar sig. Við skulum vona að þetta verði frábært veiðitímabil," er haft eftir Wigan í frétt frá NASF, verndarsjóði villtra laxa í Norður-Atlantshafi, sem Orri stýrir.

Orri segir við Fréttablaðið að opnun Helmsadale dragi jafnan marga að. Hann nýtti áhugann til að koma verndarsjónarmiðum á framfæri. „Við vorum líka í sjónvarpi og í blöðunum þarna því við erum að berjast fyrir því Skotar hætti sínum netaveiðum laxi í sjó og færi eldisiðnaðinn í betra og sjálfbært horf," segir hann. Í blaðinu The Press and Journal er haft eftir Orra að þótt mikil framför hafi orðið í þessum efnum í Skotlandi sé þar enn langur vegur ófarinn.

Lífríkið í Helmsdale hefur þá sérstöðu að njóta vatnsmiðlunar frá stærsta uppistöðulóni Skotlands. Ef frost ógnar hrognum í jaðri árinnar er hægt að auka vatnsstreymið til að vernda þau. Og í þurrkum er hægt að auka vatnsstreymið til að auðvelda laxi við ósana að ganga í ána áður en hann verður sel að bráð.

Þess má geta að laxveiði á Íslandi hefst ekki fyrr en í júní. gar@frettabladid.is