Lögmaður tók handboltann fram yfir skuldara í vanda

Erla Ellertsdóttir, sem er í greiðsluaðlögun hjá Umboðsmanni skuldara, varð heldur undrandi þegar hún fékk tölvupóst frá umsjónarmanni sínum hjá embættinu þar sem hann sagðist ekki hafa haft tíma til að sinna Erlu þar sem hann var upptekinn af handboltanum í sjónvarpinu.

Erla var gestur í Bítinu á Bylgjunni í morgun þar sem hún sagði af samskiptum sínum við Umboðsmann skuldara. Þar las hún upp úr bréfinu frá umsjónarmanni sínum, Guðrúnu Hólmsteinsdóttur héraðsdómslögmanns. Þar segir Guðrún:

„Síðan hefur handboltinn aðeins sett í strik í reikninginn, það er að ég hef verið að horfa á hann í staðin fyrir að vinna."

Upptöku af viðtalinu í Bítinu í morgun má finna hér, eða með því að smella á tengilinn hér efst, en það er í seinni hluta viðtalsins sem talið berst að bréfinu.

DV.is hafði samband við Guðrúnu í dag og biðst hún afsökunar á skrifum sínum.

„Ég vildi bara vera hreinskilin með þetta í stað þess að finna einhverjar aðrar afsakanir, en eins og ég sagði líka í póstinum þá er búið að vera mikið að gera hjá mér," segir Guðrún í samtali við DV.is

„Ég er alveg sammála því að það er kannski ekki rétt að henda þessu svona fram. En þegar ég spjallaði við þau þarna á fundinum þá fannst mér þau vera svona nokkuð róleg og hélt kannski að þau hefðu sjálf verið að horfa á handboltann eins og flest allir aðrir. En ég er alveg sammála því að þetta eru ekki rétt vinnubrögð hjá mér," segir hún þar.