Ellefu litlir hvolpar teknir með keisara

Ellefu hvolpum var hjálpað í heiminn í Dýralæknamiðstöðinni í Grafarholti í gær. Þeir voru teknir með keisaraskurði sem tveir dýralæknar á spítalanum framkvæmdu. Allir voru þeir sprelllifandi og komnir á spena þegar tíkurnar tvær sem áttu þá voru útskrifaðar síðdegis. Í báðum tilvikum var um tíkur af ensku bolabítskyni að ræða.

„Þetta gekk allt rosalega vel," segir Sif Traustadóttir dýralæknir, sem gerði annan keisaraskurðinn. Hún segir sjálfa aðgerðina taka um það bil klukkustund. Fyrst þurfi að undirbúa tíkina, setja upp æðalegg hjá henni til að setja vökva í æð, raka allan kviðinn og sótthreinsa svæðið áður en hún fer inn á skurðstofuna. Í tilvikunum í gær var einnig sett upp barkaþræðing og tíkunum gefið súrefni meðan á aðgerðinni stóð.

Miklar annir hafa verið á Dýralæknamiðstöðinni í desember, að sögn Sifjar. Auk heilsufarsskoðana, geldinga og ormahreinsana hafa komið inn dýr með margs konar kvilla og lemstur sem hefur þurft að sinna.

„Um daginn var komið með kettling sem var að þvælast fyrir þegar verið var að hella stíflueyði í niðurfall. Hann skellti loppunni undir bununa og brenndist illa á fæti."

Að ýmsu þarf að huga yfir jól og áramót þegar gæludýr eru á heimilinu.

„Hvolpar og kettlingar eru forvitnir og hafa engan skilning á því hvað kertalogi er. Þau geta velt skreytingum um koll og kettlingar reyna að hnusa af loganum og brenna þá af sér veiðihárin. Því þarf fulla aðgát og eftirlit."

Margir vilja gleðja dýrin sín um jólin með einhverju góðgæti. En sú gleði getur snúist í andhverfu sína. „Súkkulaði er eitrað fyrir hunda og ketti. Það er algengt að fólk hafi samband við okkur vegna hunda sem fengið hafa súkkulaðieitrun ásamt meðfylgjandi niðurgangi, uppköstum og sleni. Dökkt súkkulaði er hættulegast. Rúsínur eru einnig eitraðar þannig að rúsínusúkkulaði er baneitraður kokkteill. Þá ætti ekki að gefa hundunum reyktan og saltaðan mat því það er ávísun á niðurgang morguninn eftir."

Loks bendir Sif á hættu sem getur stafað af flugeldum um áramót. Auk hræðslunnar sem hrjáir hundana þegar hvellirnir byrja þarf að passa að þeir komist ekki í að naga leifar af flugeldum eftir áramót.

„Við fengum einn sem hafði nagað flugeldaprik í fyrra og hann drapst. Í þessu eru þungmálmar og fleiri efni sem dýrin þola alls ekki."

jss@frettabladid.is