Landskjörstjórn fundar síðar í dag

Landskjörstjórn ætlar að hittast á fundi klukkan fimm í dag til þess að ráða ráðum sínum eftir tíðindi gærdagsins þegar Hæstiréttur ákvarðaði að kosning til stjórnlagaþings skyldi ógildast. Undirbúningur og framkvæmd kosningarinnar sem Hæstiréttur ógilti var í höndum landskjörstjórnar og er formaður hennar Ástráður Haraldsson. Hann hefur ekki viljað tjá sig um niðurstöðu Hæstaréttar og mun ekki gera það fyrr en landskjörstjórn hefur fundað.

Með Ástráði í landskjörstjórn sitja Bryndís Hlöðversdóttir, Hervör Lilja Þorvaldsdóttir, Þórður Bogason og Þuríður Jónsdóttir.