Vopnað rán á Selfossi: Sýndi afgreiðslustúlku hníf

Lögreglan á Selfossi leitar nú að manni sem framdi vopnað rán í verslun Samkaupa við Tryggvagötu á Selfossi klukkan hálf sex í dag. Þegar lögreglan fékk tilkynningu um ránið fór hún strax á vettvang en þá var ræninginn á bak og burt.

Hann hafði sýnt afgreiðslustúlku hníf sem hann var með og krafist peninga af henni. Stúlkan neitaði að gefa manninum peningana og greip þá þjófurinn í vörur og hljóp út.

Leit stendur nú yfir á Selfossi en hann þekktist af upptökum úr öryggismyndavél í búðinni.