Ánægð með mætingu foreldra við Ráðhúsið

„Við mættum og sýndum afstöðu okkar til niðurskurðarins með því að vera sýnileg," segir Edda Björk Þórðardóttir, formaður samtaka foreldrafélaga leikskóla í Reykjavík.

Samtökin, Börnin okkar, hvöttu foreldra leikskólabarna til að safnast saman í og við Ráðhúsið og mótmæla niðurskurði í leikskólum borgarinnar á sama tíma og borgarstjórnarfundur fór fram í dag. Edda segist vera afar ánægð með mætinguna. Áhorfendapallarnir hafi fyllst þar sem nokkur hundruð manns mættu í Ráðhúsið.

Edda Björk segir Börnin okkar og SAMFOK, samtök foreldra grunnskólabarna í Reykjavík, vinna vel saman þar sem áherslur samtakanna eru áþekkar.

Næstkomandi fimmtudag fer fram í Ráðhúsinu opinn fundur foreldra leikskóla- og grunnskólabarna í Reykjavík. Jón Gnarr, borgarstjóri, og Oddný Sturludóttir, formaður menntaráðs, verða með framsögu á fundinum. Edda Björk hvetur foreldra leik- og grunnskólabarna til að fjölmenna á fundinn. Fundurinn hefst klukkan 17:30.