Segir hrun blasa við í tónlistarkennslu

Reykjavíkurborg hefur boðað allt að átján prósenta niðurskurð á fjárveitingum til tónlistarskóla á komandi skólaári. Viðræður ríkis og borgaryfirvalda standa þó yfir og segir formaður menntaráðs Reykjavíkur að hún sé bjartsýn á að ná niðurskurðartölunni niður í ellefu prósent.

Niðurskurðurinn er boðaður ofan á gildandi þjónustusamninga borgarinnar og tónlistarskólanna og segir Sigrún Grendal, formaður Félags tónlistarskólakennara, að í þeim samningum sé kveðið á um að skólarnir skuli veita tilteknum fjölda nemenda þjónustu út núverandi skólaár.

„Skilaboðin til skólanna eru þau að ef þeir eigi að halda sig innan ramma fjárheimilda þurfi þeir að framkvæma yfir fimmtíu prósenta niðurskurð á næsta hausti," segir Sigrún. „Og leggst það ofan á tuttugu prósenta niðurskurð frá árunum 2008 til 2010."

Sigrún bendir einnig á að næsta haust eigi líklega að fella niður fjárframlög til nemenda sem hafi náð sextánda aldursári.

„Þar með er verið að ganga algjörlega gegn eðli og uppbyggingu tónlistarfræðslu," segir hún. „Borgin hefur gegnt mikilvægu hlutverki í þessu kerfi, þar sem nemendur sem eru lengst komnir í námi í tónlistarskólum af landinu öllu hafa sótt til Reykjavíkur til að sækja sér menntun á efri stigum. Nái þessar áætlanir fram að ganga blasir við hrun á kerfinu.“

Oddný Sturludóttir, formaður menntaráðs Reykjavíkur, segir margar villandi tölur vera í umferð og þær beri að skoða með hliðsjón af viðræðum sveitarfélaga við ríkið um framtíðarfyrirkomulag tónlistarnáms þeirra sem eldri eru og sé þá gjarnan miðað við sextán ára aldurinn.

„Við erum að móta stefnu til framtíðar og í ágúst samþykktu allir flokkar að börn og ungmenni yrðu þar í forgangi," segir Oddný. „Síðan yrðu settar einhvers konar aldurstakmarkanir haustið 2011. En það kemur ekki til greina að fella niður fjárveitingar til allra sem eru eldri en sextán ára."

Oddný segir menntaráð hafa fundað reglulega með fulltrúum skólastjóra og kennara tónlistarskóla við mótun stefnunnar. Einnig sé verið að vinna í því að finna farsæla lausn til framtíðar í samvinnu við mennta- og menningarmálaráðuneytið. Hún segir viðræður vera að taka á sig mjög jákvæða mynd og munu sennilega vera þeim tónlistarnemendum sem eldri eru til framdráttar.

sunna@frettabladid.is