Alvarlega vegið að öryggi fólks

Alvarlega er vegið að öryggi lögreglumanna sem og landsmanna allra vegna niðurskurðar á fjármagni til löggæslumála, segja yfirlögregluþjónar á Íslandi. Í ályktun frá stjórn Félags yfirlögregluþjóna lýsa þeir yfir þungum áhyggjum af stöðu löggæslunnar á Íslandi í heild sem og kjaramálum lögreglumanna.

„Mannfæð og gjörbreytt vinnuumhverfi vegna aukinnar hörku, skipulagðrar glæpastarfsemi og fjárhagsvanda í kjölfar hruns leiðir af sér aukna hættu á að lögreglumenn verði fyrir árásum í starfi og aðstoð þá ýmist langt undan eða ófáanleg. Þrátt fyrir þetta er boðuð frekari skerðing á fjárframlögum til löggæslu," segir í ályktuninni.

Þá segir að bæði formlegir og efnislegir gallar séu á nýfenginni niðurstöðu gerðardóms og ljóst að um hana geti ekki orðið sátt að óbreyttu. Stjórnin skorar á fjármálaráðherra að ganga nú þegar til viðræðna við fulltrúa Landssambands lögreglumanna og tryggja leiðir til að sátt skapist um kjör lögreglumanna og löggæslu á landinu.