Órólega deildin leikur sér að eldinum

Þeir stjórnarliðar sem líta á stjórnarsáttmálann sem plagg sem ekki þurfi að taka mark á eru að leika sér að eldinum, að mati Jóhannu Sigurðardóttur, forsætisráðherra. Hún segir óróleika innan VG hafa skaðað ríkisstjórnarsamstarfið og dregið úr trúverðugleika ríkisstjórnarinnar.

Þetta var meðal þess sem fram kom í ræðu Jóhönnu á flokksstjórnarfundi Samfylkingarinnar í dag. Hún sagði að vissulega væri oft á tíðum tekist á innan Samfylkingarinnar um leiðir að þeim markmiðum sem kveðið væri á um í stjórnarsáttmálanum. „En við leysum ólík sjónarmið innan okkar raða þegar þau koma upp. Það sýnir styrk flokksins og af því er ég stolt."

Þá sagði hún: „Því er hins vegar ekki að leyna að sá óróleiki sem verið hefur í samstarf við hluta þingflokks Vinstri grænna hefur skaðað stjórnarsamstarfið og dregið úr trúverðugleika ríkisstjórnarinnar. Vegna órofa samstöðu innan Samfylkingarinnar og trausts samstarfs við formann og stærstan hluta VG hefur þetta hins vegar ekki stöðvað framgang mikilvægra mála ríkisstjórnarinnar."

Pólitískur einleikur á kostnað samstarfsfélaga

Jóhanna sagði að það væri hættulegur leikur að spila pólitískan einleik á kostnað samstarfsfélaga sinna í trausti þess að samstaða annarra og stuðningur við óvinsælar en óhjákvæmilegar ákvarðanir tryggi að uppúr stjórnarsamstarfinu slitni ekki.

„Hættulegur leikur sem gæti endað öðruvísi en menn ætla. Þeir stjórnarliðar sem líta á samstarfsyfirlýsingu stjórnarflokkanna sem plagg sem ekki þarf að taka mark á eru að leika sér að eldinum."

„Svo lengi sem ég fæ einhverju ráðið“



Jóhanna sagði ný lög hafa verið sett um framkvæmd þjóðaratkvæðagreiðslna, siðareglur innan stjórnsýslunnar og um heildarendurskoðun stjórnarskrárinnar á sérstöku stjórnlagaþingi.

„Óvænt ógilding Hæstaréttar á kosningunum mun ekki eyðileggja stjórnlagaþingið. Áður en kosið verður nýtt Alþingi mun ný stjórnarskrá, mótuð á stjórnarlagaþingi þjóðarinnar, afgreidd á þingi. Þannig verður það svo lengi sem ég fæ einvherju ráðið,“ sagði Jóhanna.

Hún rifjaði upp að Sjálfstæðisflokkurinn lagðist gegn því fyrir tveimur árum að að gerðar yrðu breytingar á stjórnarskránni.

„Íhaldið barðist á móti þessum miklu lýðræðisumbótum og stjórnlagaþing vildu þeir ekki sjá. Breytingar á stjórnarskránni áttu áfram að vera í gamla farinu hjá flokkunum sem ekki hafa áratugum saman haft burði til að ná fram nauðsynlegum breytingum og eitur í þeirra beinum var að þjóðin sjálf fjallaði á stjórnlagaþingi um málið,“ sagði Jóhanna.