Dýralæknar selja lyf yfir leyfilegu verði

Lyfjaverð hjá dýralæknum er of hátt að mati Lyfjastofnunar. Samkvæmt nýrri könnun stofnunarinnar selur stór hluti dýralækna lyf yfir leyfilegu verði.

Bændablaðið fjallar í dag um könnun sem Lyfjastofnun gerði á lyfjaverði hjá dýralæknum.

Í ljós kom að fjórir dýralæknar af fimm, sem verð var kannað hjá á höfuðborgarsvæðinu, höfðu selt lyf yfir leyfilegu verði samkvæmt gildandi lyfjaverðskrá.

Við verðeftirlit hjá lyfjasölum dýralækna á Norðurlandi um miðjan desember kom einnig í ljós að í fjórum tilvikum af fimm höfðu lyf verið seld á hærra verði en leyfilegt var.

Óheimilt er að selja lyf á hærra verði en tilgreint er í gildandi lyfjaverðskrá.

Lyfjagreiðslunefnd hefur ein heimild til að ákvarða hámarksverð á lyfjum.

Ástæða þess að verð var kannað með þessum hætti er sú að margar kvartanir höfðu borist frá bændum og dýraeigendum.

Lyfjastofnun hyggst gera fleiri samskonar verðkannanir vegna þessa máls.