Arreaga gerð grein fyrir þinghelgi Birgittu

Utanríkisráðuneytið kallaði sendiherra Bandaríkjanna, Luis E. Arreaga, á fund í ráðuneytinu í morgun vegna úrskurðar að kröfu bandarískra yfirvalda um að samskiptasíðan Twitter afhendi persónuleg gögn Birgittu Jónsdóttur alþingismanns.

Ráðuneytisstjóri og þjóðréttarfræðingur sátu fundinn fyrir hönd utanríkisráðuneytisins.

Þeir kölluðu eftir frekari upplýsingum um málið og lýstu yfir alvarlegum áhyggjum af því að sakamálarannsókn beindist að íslenskum þingmanni með þessum hætti. Ljóst væri að þingmaðurinn nyti þinghelgi hér á landi og að ekki yrði ekki skilið á milli þingmannsins og Alþingis.

Samkvæmt upplýsingum frá Urði Gunnarsdóttur, upplýsingafulltrúa ráðuneytisins, lögðu þeir áherslu á að ekki yrði frekari röskun á störfum þingmannsins, þar með talið ferðafrelsi og möguleikum á því að taka þátt í pólitískri umræðu á alþjóðavettvangi.

Vísir greindi frá því í morgun að Birgitta er á leiðinni til Kanada þar sem hún heldur ræðu um IMMI-verkefnið, en það snýst um að Ísland skapi sér afgerandi lagalega sérstöðu varðandi vernd tjáningar- og upplýsingafrelsis. Vegna stefnu Bandaríkjamanna ætlar Birgitta ekki að millilenda í Bandaríkjunum heldur ferðast hún þess í stað í gegn um London í Bretlandi.