Ólíðandi að vera sett undir hatt glæpamanns

Birgitta Jónsdóttir þingmaður Hreyfingarinnar býst við að bandarísk stjórnvöld hafi óskað eftir gögnum um hana af fleiri vefsíðum en Twitter, en þeirri síðu hefur verið stefnt til að afhenda öll gögn um hana.

Bandaríska dómsmálaráðuneytið hefur stefnt Twitter samskipasíðunni til að afhenda öll gögn af Twittersíðum Birgittu Jónsdóttur þingmanns Hreyfingarinnar, Julian Assange forráðamanns Wikileaks og Bradley Mannings, hermannsins sem lak um 250 þúsund trúnaðarskjölum Bandaríkjahers til Wikileaks.

Stefnan var lögð fram í héraðsdómi í Virginiu. BBC segir að samkvæmt dómsúrskurði telji saksóknarar í Bandaríkjunum sig hafa sannanir sem skjóti stoðum undir þann grun að Twitter búi yfir gögnum varðandi yfirstandandi rannsókn á sakamáli. Twitter hefur tilkynnt Birgittu að hún hafi tíu daga til andmæla, áður en gögnin verði afhent. Hún greindi frá málinu á Twittersíðu sinni og hefur færsla hennar farið sem eldur í sinu um heimsbyggðina í fréttum erlendra.

„Mér finnst þetta að sjálfsögðu ólíðandi, upprunalega átti ég ekki að vita af þessu og það átti að afhenda þetta leynilega í desember. Þessi dómstóll er eflaust að finna leiðir til að fá Julian framseldann til Bandaríkjanna," segir Birgitta.

Birgitta óttast ekki að hún sé á leið í fangelsi í Bandaríkjunum en ætlar að krefja bandarísk stjórnvöld um skýringar og hún hefur fengið bandaríska lögfræðinga í lið mér sér til að berjast gegn því að gögnin verði afhent. En Birgitta aðstoðaði Wikileaks á sínum tíma við að koma myndbandsupptöku á vefinn þar sem bandarískir hermenn sjást skjóta á óbreytta borgara í Bagdad í Írak úr þyrlu.

„Mér finnst ólíðandi að ég sé sett undir hatt glæpamanns fyrir að vinna að þessu vídeói og starfa sem sjálfboðaliði fyrir Wikileaks. Ef Bandaríkin þurfa upplýsingar um mig, gætu þau haft samband við mig beint, sendiherrann hefði til dæmis getað talað við mig beint."