Ögmundur mun ekki geta tekið ákvörðun um Nubo einn

Ögmundur Jónasson innanríkisráðherra mun þufa að taka tillit til sjónarmið annarra ráðherra þegar ákvörðun verður tekin um það hvort leyfa eigi Huang Nubo, kínverska auðmanninum, að fjárfesta í jörð á Grímsstöðum á Fjöllum.

Árni Páll Árnason, efnahags- og viðskiptaráðherra vakti máls á þessu á fundi ríkisstjórnarinnar í gær og lagði fram minnisblað þess efnis. Hann segir að enginn efist um það að innanríkisráðherra hafi forræði á svari til Nubos. „En við það svar reynir á ýmis sjónarmið. Meðal annars almenn sjónarmið um erlenda fjárfestingu. Og erlend fjárfesting í atvinnuskyni er á forræði efnahags- og viðskiptaráðuneytisins. Önnur ráðuneyti koma líka að þessu," segir Árni Páll. Þar er meðal annars um að ræða utanríkisráðuneyti í gegnum gerð fjárfestingasamninga. „Ég var að leggja áherslu á að þessi sjónarmið kæmust að við afgreiðslu málsins. Við munum taka saman efni að þessu leyti út frá því sem að okkur snýr í málinu og koma því á framfæri við innanríkisráðuneytið," segir Árni Páll í samtali við Vísi. 

Árni Páll vill ekki segja af eða á um hvernig svara eigi beiðni Huang Nubos. Það sé á forræði innaríkisráðherra. Almennt séð þurfi Íslendingar að taka vel á móti fjárfestum sem eru til í að hætta peningum sínum á íslandi.„Við höfum ekki haft ofgnótt af slíkum tækifærum í fortíðinni og mikilvægt að við fáum fjárfestingu sem fylgir ný þekking í nýjum atvinnugreinum. Og það þarf afskaplega gild rök til að hafna sliku," segir Árni Páll. Hann segir einkum mikilvægt að skoða erindi erlenda fjárfesta þegar fyrir liggur að þeir ætlast ekki til þess að fá undanþágur frá elmennum reglum sem gilda um atvinnustarfsemi.