Verðum að standa saman

UN Women hafa öðruvísi nálgun á réttindabaráttu kvenna en flest önnur alþjóðleg samtök. Þetta er afskaplega mikilvægur samvinnuvettvangur sem gerir það að verkum að minni félög um heim allan geta tengst og unnið saman að sameiginlegum markmiðum.

Þetta er mat Sabiha Husic og dr. Zilka Spahic-Siljac, tveggja kvenna frá Bosníu, sem hafa barist í fjölda ára fyrir réttindum kvenna í landinu. Þær eru nú staddar hér á landi í tilefni af Fiðrildaviku UN Women og munu taka þátt í málþingi samtakanna og Háskóla Íslands.

„Samtökin UN Women veita okkur þann stuðning, skilning og hvatningu sem þarf til að standa vörð um réttindi kvenna,“ segir Spahic-Siljac. „Kynbundið ofbeldi á sér stað um allan heim og það þarf að uppræta. Konur þurfa að hafa meiri áhrif varðandi efnahags- og öryggismál, sérstaklega þar sem stríð hefur geisað.“

Að mati kvennanna hefðu þau samtök sem þær standa að ekki náð sama árangri og raun ber vitni ef ekki hefði verið fyrir tilstuðlan UN Women.

„Við höfum náð miklum árangri í Bosníu og það var, og er, mikil þörf á því. Við höfum náð að koma okkur í samband við önnur sambærileg samtök úti í heimi og það er ómetanlegt.“

Husic tekur undir orð Spahic-Siljac og undirstrikar mikilvægi tengslanets í grasrótarstarfi. „Við höfum unnið mikið með ólíkum hópum; konum sem hafa verið fórnarlömb stríðs, upplifað kynbundið ofbeldi og mansal.

En við áttuðum okkur betur á því, fyrir tilstuðlan UN Women, að það er einnig mikilvægt að fá karlmenn með í umræðuna,“ segir Husic og bætir við að nú í fyrsta sinn séu karlmenn virkir í baráttunni gegn kynbundnu ofbeldi í Bosníu.

„Við náðum að virkja karlmenn í tólf bæjarfélögum í Bosníu til að taka þátt í verkefnunum okkar og það gekk vonum framar,“ segir hún. Spahic-Siljac hefur unnið mikið með trúarbrögð í ólíkum samfélögum og notar trúarleg gildi til að ná til fólksins.

„Við höfum rannsakað hvernig hægt er að tala um kynbundið ofbeldi út frá ólíkum trúarbrögðum og það skilaði miklum árangri,“ segir hún. „Þú getur talað í heilan dag um mannréttindi, norm og viðmið, en ef þú nærð ekki inn í hjarta og huga fólks með það sem skiptir það raunverulega máli, eins og trúarbrögð, þá skilar það engu.“



Fiðrildaviku UN Women lauk formlega á laugardag en hægt er að leggja málefninu lið á heimasíðu samtakanna, www.unwomen.is.

sunna@frettabladid.is