Formaður Sjálfstæðisflokksins segist finna fyrir stuðningi

Flestir þingmenn Sjálfstæðisflokksins styðja Icesave-samningana. Þá hefur óánægja meðal flokksmanna ekki birst í mörgum úrsögnum úr flokknum þótt andstaðan sé hörð á veraldarvefnum. Formaður flokksins segist finna fyrir miklum stuðningi.

Þingflokkur Sjálfstæðisflokksins skiptist í tvær fylkingar í Icesave-málinu. Það er hópur þeirra sem munu styðja Icesave-samningana og fylgja forystu flokksins að máli og hins vegar þeir sem eru á móti eða vilja ekki gefa upp afstöðu sína. Meirihluti þingflokksins styður Icesave-samningana og sást það vel í atkvæðagreiðslu um lok annarrar umræðu í dag þegar níu þingmenn flokksins greiddu atkvæði með því að færa málið í þriðju umræðu. Fjórir þingmenn flokksins sátu hjá, þeir Birgir Ármannsson, Pétur Blöndal, Sigurður Kári Kristjánsson og Guðlaugur Þór Þórðarson. Unnur Brá Konráðsdóttir var eini þingmaðurinn sem greiddi atkvæði gegn því að málið færi til þriðju umræðu. Tveir þingmenn voru fjarverandi, en þau styðja bæði samningana. Ragnheiður Elín er formaður þingflokksins og Kristján Þór situr í fjárlaganefnd og hefur lýst yfir stuðningi við nýju samningana.

Nokkur óánægja er meðal flokksmanna og hún birtist sérstaklega á internetinu. Þessi óánægja birtist hins vegar ekki í úrsögnum úr flokknum, því samkvæmt upplýsingum frá skrifstofu Sjálfstæðisflokksins í Valhöll höfðu aðeins rúmlega þrjátíu manns sagt sig úr flokknum um miðjan dag í dag, en alls eru félagar alls rúmlega fimmtíu þúsund talsins.

Bjarni, fyrir utan þessa óánægju sem birtist á netinu, hefurðu orðið var við mikla óánægju meðal sjálfstæðismanna og þinna stuðningsmanna? „Bæði og, það hafa auðvitað margir lýst þeirri skoðun sinni að þetta sé gegn þeirra sannfæringu, en það hafa líka mjög margir haft samband, bæði í gegnum síma og tölvupóst og lýst mikilli ánægju með það að við höfum tekið þessa ábyrgu afstöðu og styðja hana heils hugar," segir Bjarni Benediktsson, formaður Sjálfstæðisflokksins.

Illugi Gunnarsson, fyrrverandi formaður þingflokksins sem er í leyfi frá þingstörfum, sagði í samtali við Stöð 2 í dag að hann styddi formann flokksins og forystu hans í málinu. thorbjorn@stod2.is