Alþjóðlegi krabbameinsdagurinn í dag

Um allan heim er fjórði febrúar ár hvert nýttur til að vekja athygli á vörnum gegn krabbameinum og heilbrigðis- og félagslegri þjónustu þeirra sjúklinga sem greinast með krabbamein. Alþjóðaheilbrigðismálastofnunin bendir á að krabbamein eru eitt algengasta dánarmeinið í veröldinni en um 84 milljónir munu látast af völdum krabbameina á árabilinu 2005-2015, ef ekkert er að gert.

Alþjóðasamtök um krabbameinsvarnir (UICC) leggja í ár áherslu á að efla aðferðir sem geta létt á sjúkdómsbyrði vegna krabbameina. Lögð er áhersla á að koma í veg fyrir sjúkdóminn og að bæta lífsgæði þeirra sem greinast.

Hér á landi er dagurinn m.a. nýttur til að beina athyglinni að því hvernig best má styðja þá sem fengið hafa krabbamein og aðstandendur þeirra. Í því skyni hefur Krabbameinsfélag Íslands boðað til örráðstefnunnar „Stattu með mér."

Á ráðstefnunni verður fjallað um stuðning og samskipti og reynslu þeirra sem hafa greinst með krabbamein og aðstandendur þeirra.

„Þetta er tilraun til að skoða saman frá sjónarhóli sjúklings, aðstandenda og þeirra sem veita stuðninginn með hvaða hætti best sé að sinna þessum mikilvæga þætti. Við erum sannfærð um að það felast mikil tækifæri í að bæta þennan þátt í umönnun sjúklinga, þeim til mikilla hagsbóta," segir Ragnheiður Alfreðsdóttir, framkvæmdastjóri Ráðgjafarþjónustu Krabbameinsfélags Íslands.

Ráðstefnan hefst klukkan 15:30 og stendur til 17:30 og verður haldin í Skógarhlíð 8.

Allir eru velkomnir og aðgangur að sjálfsögðu ókeypis.

Ragnheiður Haraldsdóttir forstjóri Krabbameinsfélags Íslands mun setja ráðstefnuna.

Nilsína Larsen Einarsdóttir, sem er í lyfjameðferð við eitlakrabbameini, ræðir um stuðning og samskipti í sjúkdómsferlinu.

Hinrik Greipsson, sem greinst hefur með krabbamein í blöðruhálskirtli, ræðir um sína reynslu.

Birna Einarsdóttir, móðir ungrar konu sem greindist með hvítblæði, ræðir um mikilvægi skipulagðra samskipta í veikindum.

Þorvaldur Daníelsson, ungur ekkill og tveggja barna faðir, segir frá upplifun sinni á stuðningsneti fjölskyldu og vina.

Gyða Eyjólfsdóttir doktor í ráðgjafarsálfræði ræðir um jafningjastuðning fyrir krabbameinsgreinda og aðstandendur og mikilvægi hans.

Ásdís Káradóttir hjúkrunarfræðingur, segir frá starfi Ráðgjafarþjónustu Krabbameinsfélagsins.

Í lokin verður kaffi og spjall.