Afnám heimgreiðslu borgarinnar umdeilt

Fulltrúi Sjálfstæðisflokksins í menntaráði Reykjavíkurborgar, Þorbjörg Helga Vigfúsdóttir, gagnrýnir yfirvofandi afnám heimgreiðslu, eða þjónustutryggingar, til foreldra ungra barna. Formaður menntaráðs segir að málið snúist um forgangsröðun.

Í fjárhagsáætlun ársins kemur fram að heimgreiðsla sé aflögð frá og með 1. apríl næstkomandi. Um er að ræða 20.000 króna mánaðarlegt framlag til foreldra barna frá 9 mánaða aldri, 6 mánaða í tilfelli einstæðra foreldra, til 3ja ára. Heimgreiðslu er ætlað að brúa bilið frá fæðingarorlofi þar til barnið byrjar í leikskóla. Foreldrar ráða hvort þeir nýta upphæðina til að greiða niður þóknun til dagforeldra eða vera sjálfir heima með barnið. Börn á þriðja ári þurftu hins vegar að vera komin á biðlista á leikskóla til að eiga rétt á heimgreiðslu.

690 börn fengu heimgreiðslu með sér í fyrra, en áætlaður fjöldi í ár er yfir 900 börn. Kostnaður borgarinnar vegna þessa úrræðis var 213 milljónir í fyrra, en er ráðgerður 55,4 milljónir í ár, fram að niðurlagningu.

Í nýlegri úttekt leikskólasviðs kemur fram að kostnaður borgarinnar við að hafa eitt barn á þriðja ári í leikskóla nemur um 160.000 krónum á ári. Því er ljóst að sú ráðstöfun að afnema heimgreiðslu og fjölga leikskólabörnum þess í stað hefur í för með sér talsverðan kostnaðarauka fyrir borgina. Á móti kemur að leikskólavist barna er talsvert ódýrari kostur fyrir foreldra en vistun hjá dagforeldri.

Oddný Sturludóttir, formaður menntasviðs, segir meirihlutann meðvitaðan um það, en málið snúist um forgangsröðun. „Við stóðum frammi fyrir þeim kostum að miðað við þennan mikla fjölda barna sem er að komast á leikskólaaldur hefðum við getað haldið úti þjónustutryggingunni, en ákváðum þess í stað að bjóða upp á leikskólapláss og forgangsröðum því í þágu leikskólanna og fjölskyldna sem treysta á þessa þjónustu.“

Þorbjörg Helga segir að hún trúi því ekki að meirihlutinn muni geta komið öllum börnum í árgangi 2009 inn á leikskóla í ár, þrátt fyrir góðan vilja.

„Auk þess þurfa þá börnin sem missa þjónustutrygginguna að fara til dagmömmu og það er mjög erfitt að fá dagforeldra til starfa.“ Þorbjörg segir þetta hafa verið ódýrt úrræði í erfiðri stöðu. „Að sjálfsögðu þurfum við að byggja upp leikskólakerfið, en þegar kemur svo stór árgangur er ekki hægt að ná utan um málið á einu ári og þá er betra að hafa einhver úrræði frekar en engin.“

thorgils@frettabladid.is