Síldin í Breiðafirði mjög sýkt

Frumniðurstöður úr rannsóknarleiðangri Hafrannsóknastofnunar í janúar staðfesta fyrri mælingar um mikla sýkingu í íslensku sumargotssíldinni í Breiðafirði.

Rannsóknaskipið Dröfn RE var við síldarrannsóknir í fimm daga við að kanna útbreiðslu stofnsins, magnmæla hann og síðast en ekki síst að meta og fylgjast með þróun sýkingarinnar sem herjað hefur á síldina frá árinu 2008 og valdið miklum afföllum bæði í ungsíld sem og veiðistofninum.

Alls voru tekin sjö sýni í leiðangrinum, tvö úr torfu í Grundarfirði, fjögur úr torfu í Kolgrafarfirði og eitt úr dreifðri síld í Grundarfirði. Hlutfall sýktra sílda var nánast það sama í torfunum tveimur í Kolgrafafirði og Grundarfirði, eða 43-45 prósent. Hins vegar var mun meiri sýking í sýni sem tekið var úr dreifðri síld í Grundarfirði, en þar voru 53 prósent sýkt.

Í sýnum sem tekin voru úr afla veiðiskipa á vertíðinni haustið 2010 sést að hlutfall sýktra sílda nú er óbreytt. Þessar rannsóknir nú staðfesta því fyrri mælingar um mikla sýkingu í stofninum. Fyrirhugað er að Dröfnin fari að nýju til sambærilegra rannsókna í lok þessa mánaðar. - shá