Deilt um lögmæti verkfalls fiskvinnslufólks

Félagsdómur kemur saman klukkan þrjú í dag og úrskurðar um lögmæti boðaðs verkfalls starfsmanna í fiskimjölsverksmiðjum, sem á að hefjast 7. febrúar.

Það voru samtök atvinnulífsins sem kærðu verkfallsboðun verkalýðsfélaganna Afls á Austurlandi og Drífanda í Vestmannaeyjum á þeim forsendum að samningur við félögin sé ekki sjálfstæður kjarasamningur sem fylgi verkfallsheimild heldur sé hann hluti af aðalkjarasamningi við viðkomandi félög.

SA segir að stéttarfélögin sem boða til verkfallsins hafi sett fram kröfur um launahækkanir upp á tugi prósenta og að verkfall hefði verulegt tjón í för með sér fyrir samfélagið í heild.