Ef um svindl væri að ræða ætti einhver að axla ábyrgð

Innanríkisráðherra segir stjórnarmeirihlutann staðráðinn í að stjórnlagaþing verði haldið og kjósa þurfi aftur til þess. Hann segir engan hafa gert athugasemdir við frumvarp um framkvæmd kosninganna, heldur hafi menn deilt um hvort yfirleitt ætti að boða til stjórnlagaþings.

Ekki liggur fyrir hvernig brugðist verður við niðurstöðu Hæstaréttar varðandi stjórnlagaþingið, en enginn virðist ætla að taka ábyrgð á þeim meinbugum sem voru á kosningunum. Landskjörstjórn kom saman síðdegis í dag til að ræða málin og situr væntanlega enn á fundi. Þá fundaði undirbúningsnefnd þingsins í dag en þar á bæ segjast menn ekki hafa séð um framkvæmd kosninganna.

„Forseti á von á því að alsherjarnefnd fari yfir málið með helstu sérfræðingum og þeim sem að þeim stóðu," sagði Ásta Ragnheiður Jóhannesdóttir, forseti Alþingis, við upphaf þingfundar í dag. En skipulag og framkvæmd kosninganna var í höndum dómsmálaráðuneytisins.

Ögmundur Jónasson, ráðherra segir að reynt verði að leiða það í dagsljósið sem fór úrskeiðis. En á ekki einhver að axla ábrygð? „Jú, og það gerum við, við tökum þátt í umræðum um þessi mál og reynum að leiða það í dagsljósið sem fór úrskeiðis," segir Ögmundur.

Málið snúist hins vegar um formgalla sem hefðu getað valdið því að eitthvað færi úrskeiðis í kosningunum, sem ekki hafi gerst.

„Ef um hefði verið að ræða svindl eða vafasamir hlutir hefðu átt sér stað, þá væri ástæða til að einhver axlaði ábyrgð, eins og þú orðar það," segir Ögmundur.

Mikilvægast sé að allir fari yfir málið og læri af mistökunum. Ríkisstjórnin sé enn staðráðin í að stjórnlagaþing komi saman.

Á að kjósa aftur og setja ný lög? „Mér finnst það liggja í kortunum já."

Málið var rætt á Alþingi í dag og vildi stjórnarandstaðan að ríkisstjórnin tæki á sig alla ábyrgð á málinu.