Hitti Ben Stiller: Þetta var bara geðveikt

„Þetta var mjög skemmtilegt og bara „made my day" og alla mína daga núna," segir Dagný Ósk Hermannsdóttir, heimavinnandi húsmóðir á Stykkishólmi, sem hitti á stórleikarann Ben Stiller fyrr í dag.

Stiller hefur verið hér á landi í nokkra daga og hefur spurst til hans í Hörpunni og Austurlandi meðal annars. Hann er hér á landi til að skoða tökustaði fyrir kvikmynd sem hann er með í undirbúningi.

„Ég var beðin um að koma með lykil til þess að opna Gamla apótekið og ég vissi nákvæmlega ekki neitt fyrir hvern ég var að fara opna. Svo koma þarna tveir menn og annar þeirra kynnti sig og sagðist heita Jeff og svo kynnti hann Ben Stiller og ég bara: Þú ert að djóka í mér? Hann var bara mættur í Hólminn," segir hún.

Minnsta málið að taka mynd

Dagný Ósk segir að leikarinn hafi verið mjög viðkunnalegur og spjallað heilmikið við sig. Hann hafi ekki verið með neina stjörnustæla þrátt fyrir að vera heimsfrægur grínleikari. „Ég hélt að það myndi verða eitthvað svoleiðis en neibb, það er ekki til í honum. Við spjölluðum svolítið saman og hann sagði mér hvað hann væri að fara gera hérna," segir hún.

Hún fékk að taka mynd af sér með leikaranum og þegar þrettán ára sonur hennar hafi frétt af því hafi hann fengið líka mynd af sér með honum. „Það var bara minnsta málið."

Hún segist hafa séð frétt þess efnis að hann væri hér á landi en ekkert spáð í því meira. Því hafi það komið á óvart að sjá hann í dag. „Nei nei, Ben Stiller bara við höfnina í Stykkishólmi og Dagný litla bara: Já sæll. Þetta var bara geðveikt," segir hún kímin og tekur fram að það hafi komið sér á óvart hversu lítill hann er. „Hann var eiginlega bara jafnstór og ég, ég hélt hann væri stærri."

„Easy" gæi

Uppáhaldsmyndir Dagnýjar Óskar sem Stiller leikur í eru Zoolander, Night at the Museum og Meet the Fockers. „Mér finnst myndirnar hans æði og hann hefur alltaf verið í uppáhaldi, hann er svo fyndinn og skemmtilegur," segir hún. Spurð að því hvort hann hafi ekki sagt einhverja brandara segir hún: „Nei, veistu hann var svo rólegur, mjög „easy" gæi og svo elskulegur."