60 milljónum króna úthlutað til rannsóknartengdra verkefna

Fyrr í dag fengu 15 doktornemar við Háskóla Íslands úthlutað samtals 60 milljónum króna í styrki úr Háskólasjóði Eimskipafélags Íslands. Við athöfn í Hátíðasal háskólans kom enn fremur fram að síðar á árinu verður aftur úthlutað úr sjóðnum þannig að heildarúthlutun á árinu mun nálgast 100 milljónir króna.

Að þessu sinni var úthlutað úr sjóðnum til rannsóknartengdra verkefna á fjölmörgum sviðum, m.a. sagnfræði, matvæla- og næringarfræði, íslensku, sálfræði, uppeldis- og menntunarfræði, rafmagns- og tölvuverkfræði, jarðskjálftaverkfræði, lyfjafræði, íslenskum bókmenntum, kynjafræði, eðlisfræði, eðlisefnafræði, mannfræði og orðabókafræði. Fimm verkefni hljóta styrki til þriggja ára, sex verkefni til tveggja ára og fjórir styrkir eru veittir til doktorsnema sem ljúka rannsóknum á næsta ári. Sex styrkþeganna koma erlendis frá til doktorsnáms við Háskóla Íslands, að því er fram kemur í tilkynningu.

Kristín Ingólfsdóttir, rektor Háskóla Íslands, sagði af þessu tilefni: „Það er áberandi í löndunum í kringum okkur hversu sterkt ákall hefur komið frá atvinnulífinu um aukinn fjölda doktorsmenntaðra. Til að mæta þessu hafa háskólar á Norðurlöndum, og reyndar um allan heim, sett skýra stefnu um fjölgun doktorsnema. Þetta hefur Háskóli Íslands líka gert með áherslu á eflingu vísindastarfs og uppbyggingu doktorsnáms þar sem ströngum alþjóðlegum gæðakröfum er fylgt. Þegar saman koma metnaðarfullir doktorsnemar og öflugir leiðbeinendur verður til kröftugt vísindastarf sem leiðir til verðmætasköpunar á fjölmörgum sviðum. Framlag Háskólasjóðs H/f Eimskipafélags Íslands til stuðnings þessari uppbyggingu Háskóla Íslands er ómetanlegt."

Rekstur Háskólasjóðs H/f Eimskipafélags Íslands er í umsjá Landsbankans. Ávöxtun sjóðsins hefur verið góð síðastliðin tvö ár sem gerir úthlutun mögulega nú en um er að ræða fjórðu úthlutun úr sjóðnum.

„Hluti af samfélagslegri ábyrgð fyrirtækja er að styðja við menntun og rannsóknir og fjárfesta með því í hugviti og þekkingu framtíðarinnar. Sá stuðningur kemur á endanum öllu samfélaginu til góða því menntun leggur grunn að fjölbreyttu og kröftugu samfélagi," sagði Gunnar Helgi Hálfdanarson, formaður bankaráðs Landsbankans og formaður stjórnar Háskólasjóðs H/f Eimskipafélags Íslands, í tilefni dagsins. „Ný þekking knýr áfram nýsköpun í atvinnulífinu og þar með hagvöxt sem er undirstaða efnahagslegra framfara og að mati margra aukinnar velferðar í framtíðinni. Það er einstaklega ánægjulegt að vera aðili að Háskólasjóðnum og taka þátt í úthlutun úr honum til okkar efnilegustu vísindamanna."