Fjöldi manns í hrakningum á Holtavörðuheiði

Fjöldi manns á hátt í tuttugu bílum lentu í hrakningum á Holtavörðuheiði í gærkvöldi og þurftu björgunarsveitir að koma fólkinu til aðstoðar.

Í frystu var reynt að aðstoða fólk í bílum sínum niður af heiðinni og lagði Vegagerðin til tæki og mannskap en verkið sóttist seint í aftaka veðri.

Var þá brugðið á það ráð að skilja bílana eftir og ferja fólkið í bjögunarsveitarbílum niður í Staðarskála og fengu svo einhverjir tugir manna gistingu í Reykjaskóla í nótt. Farið verður að sækja bílana og ryðja heiðina um leið og veður leyfir.

Björgunarsveitarmenn þurftu líka að aðstoða vegfarendur um Bröttubrekku og Fróðárhgeiði á Snæfellsnesi í gærkvöldi og Öxnadalsheiði lokaðist líka.

Ekki er vitað til þess að neinn hafi sakað í þessum hrakningum, en bæði Veðurstofan og Vegagerðin höfðu varað við óveðri og ófærð.