Pabbi Elvisar er meiri Stones aðdáandi

Elvis lifir og býr í Hafnarfirði. Fréttastofa heimsótti frumburð ungra hjóna sem var skírður í höfuðið á sjálfum konungi rokksins.

Ólafur Daði Helgason og Olga Möller búa á Burknavöllum í Hafnarfirði. Í desember eignuðust þau son og ákváðu að fara ekki troðnar slóðir þegar kæmi að því að finna nafn á drenginn.

„Ég get viðurkennt að ég er meiri Stones aðdáandi - það hljómar bara ekki jafn vel Mick Ólafsson til dæmis. Þetta er bara töff nafn, rokk og ról." segir faðirinn Ólafur Daði Helgason.

Og móðirin, Olga Möller, tók vel í hugmyndina. „Já, Elvis er dáinn og er ekki fara gera neitt af sér," segir hún og Ólafur Daði bætir við. „Hana langaði í Svarthöfði fyrst. En við sættumst á þetta bara."

Mannanafnanefnd úrskurðaði að Elvis væri gott og gilt íslenskt nafn. Mannanafnanefnd gaf grænt ljós og aðeins fjórum dögum eftir úrskurðinn var drengurinn skírður.

En hvað sögðu mamma og pabbi? „Það eru allir sáttir nema afi. Hann er hundrað ára íslenskufræðingur og ekki alveg að skilja þetta," segir Ólafur Daði. „Amma er forfallin Elvis aðdáandi og hún ljómaði öll í kirkjunni," segir Olga.