Pearce: Hörð samkeppni í riðlinum

Stuart Pearce, landsliðsþjálfari U-21 liðs Englands, á von á harðri samkeppni um efsta sætið í riðli liðsins í undankeppni EM 2013.

England er í riðli með Íslandi, Noregi, Belgíu og Aserbaídsjan. Alls eru tíu riðlar í undankeppninni og komast sigurvegarar hvers riðils áfram í umspil auk þeirra fjögurra liða sem ná bestum árangri í 2. sæti.

England og Ísland keppa bæði í úrslitakeppni EM í Danmörku í sumar og mætast í vináttulandsleik í næsta mánuði.

„Við ætlum ekki að fara of langt fram úr okkur því við þurfum fyrst og fremst að einbeita okkur að mótinu í sumar," sagði Pearce.

„En þetta verður mjög erfið undankeppni fyrir okkur. Ísland keppir í Danmörku í sumar og við eigum erfiða leiki fyrir höndum gegn hinum liðunum."

„Það er því ljóst að þau lið sem komast til Ísraels árið 2013 munu hafa lagt mikið á sig til að komast þangað og eiga það skilið."