Hrinti sambýliskonu sinni fram af svölum

Ríkissaksóknari hefur ákært mann á fertugsaldri fyrir að halda konu nauðugri og misþyrma henni. Að því búnu sló hann hana svo hún féll niður af svölum. Hann er einnig ákærður fyrir hótun og tilraun til fjárkúgunar. Hann játaði að hafa haldið konunni nauðugri en neitaði að hafa misþyrmt henni. Þá tók hann ekki afstöðu til ákæru um hótun og tilraun til fjárkúgunar við þingfestingu.

Maðurinn, Ingvar Árni Ingvars­son, var einn af fimmtán mönnum sem dæmdir voru í stóra fíkniefnamálinu árið 2000, sem var eitt umfangsmesta mál sem komið hafði upp þá. Hann var þá dæmdur í tveggja ára og sex mánaða fangelsi fyrir að hafa staðið að kaupum á 660 grömmum af kókaíni í Bandaríkjunum og flutt í varahlut til landsins. Áður hafði hann hlotið tvo refsidóma fyrir meiri háttar líkamsárás og eignaspjöll.

Ingvar Árni er nú ákærður fyrir að hafa fimmtudaginn 31. desember 2009 dregið fyrrverandi sambýliskonu sína með ofbeldi inn í íbúð sína og haldið henni þar nauðugri. Í ákæru segir að hann hafi veist að henni, rifið í hár hennar, slegið hana margsinnis í andlit og líkama, sparkað í fætur hennar og hótað henni lífláti og líkamsmeiðingum. Er konan hugðist flýja íbúðina með því að fara fram af svölum reif maðurinn í hár hennar og sló hana með þeim afleiðingum að hún féll fjóra metra fram af svölunum og niður á verönd íbúðar á jarðhæð. Við þetta hlaut konan mörg beinbrot, skurð á enni og fleiri áverka.

Þá er hann einnig ákærður fyrir að hafa aðfaranótt fimmtudagsins 24. nóvember sent sambýliskonu sinni skilaboð með samskiptaforritinu Facebook. Með þeim hótaði hann henni og bróður hennar líkamsmeiðingum eða lífláti ef hún greiddi ekki tvær milljónir króna inn á bankareikning hans fyrir lokun banka á föstudag.

Í skilaboðunum sagði meðal annars: „ég mun ekki hætta fyrr en ég er búinn að eyðileggja líf þitt gjörsamlega og bróðir þins lika, það munu stelpur ganga frá þér og útlendingar frá bróðir þínum, ef ég væri þú þá myndi ég flytja úr landi þvi ég hætti ekki fyrr en ég fer í fangelsi eða verð drepinn“.

Maðurinn er enn fremur ákærður fyrir að hafa miðvikudaginn 23. nóvember 2010 sent eða látið senda skilaboð úr tölvu á heimili sínu, í farsímanúmerið í eigu foreldris: „sonur tinn verdur limlestur fyrir ad fyrirskipa aras a heimilid hans ingvars og lif ykkar lagt i rust“.

jss@frettabladid.is