Óska eftir vitnum að nauðgun í Herjólfsdal

Í morgun kærði kona á þrítugsaldri kynferðisbrot sem mun hafa átt sér stað aðfaranótt mánudags á tímabilinu frá hálf tvö til tvö við hljóðskúr í Herjólfsdal í Vestmannaeyjum.

Lögreglan óskar eftir upplýsingum hugsanlegra vitna að átökum manns eða tveggja manna við konu á þessum stað á þessum tiltekna tíma. Þeir sem geta veitt upplýsingar um málið eru beðnir um að hafa samband við lögregluna á Selfossi í síma 480-1010 eða lögregluna í Vestmannaeyjum í síma 481-1665.

Í tilkynningu frá lögreglu segir að þetta sé önnur kæran sem borist hefur lögreglunni á Selfossi vegna meints kynferðisbrots í Vestmannaeyjum um liðna Verslunarmannahelgi.