Óskabarn þjóðarinnar

Rapparinn Ramses fagnar útgáfu fyrstu breiðskífu sinnar í kvöld. Hann blandar saman rappi og popptónlist á plötunni, sem hann segir nauðsynlegt ætli menn að fá eitthvað út úr harkinu.

„Ég er búinn að dunda mér við þetta í tíu ár og er loksins að gefa út alvörubreiðskífu," segir rapparinn Ramses, sem var þó gefið nafnið Guðjón Örn Ingólfsson.

Ramses hefur sent frá sér plötuna Óskabarn þjóðarinnar. Hann segist fara um víðan völl á plötunni ásamt því að rappa digurbarkalega um sjálfan sig. Eins og rapparar gera.

Er þetta svo kryddað með kellingum og djammi?

„Jájá. Það er nokkuð um það og um hvað lífið er ljúft með þeim. Svo fjalla ég um rappsenuna á Íslandi og ýmislegt annað. Það er erfitt að sigta eitthvað eitt út."

Hipphopp-tónlist hefur upp á síðkastið blandast saman við hefðbundna popptónlist í ríkari mæli en áður þekktist. Áhrifin hafa rekið land á Íslandi sem kom berlega í ljós á frábærri sólóplötu Erps Eyvindarsonar, Blaz Roca, sem kom út fyrir síðustu jól. Þá hafa rapparar á borð við Didda Fel og Emmsjé Gauta blandað saman rappi og popptónlist með góðum árangri.

En er sama uppi á teningnum hjá Ramsesi?

„Já. Ég gerist sekur um það. Platan er svolítið poppuð. Hún er partívæn."

Er nokkuð að því?

„Nei. Það er bara flott. Maður verður að gera það. Stefnan er svona og ef maður ætlar að fá eitthvað út úr þessu þarf maður að fara í þessa átt í bland við gamla, góða fílinginn."

Spurður hvort hann skjóti á aðra rappara á plötunni segist Ramses vera voðalega lítið í því. „Allavega á þessari plötu," segir hann. „Ég nenni ekki að standa í því. Þetta er svo lítil og veik sena eins og er að mér finnst að fólk eigi frekar að standa saman í staðinn fyrir að skjóta á hvert annað."

Ramses heldur útgáfutónleika í Risinu (gamla Glaumbar) í kvöld klukkan 23. 500 krónur kostar inn á tónleikana, en ef sex stelpur mæta saman í hóp fá þær frítt inn. DJ Kocoon er plötusnúður kvöldsins og á meðal þeirra sem koma fram ásamt Ramsesi eru Diddi Fel, Mælginn, Orri Err og KáEffBé.

atlifannar@frettabladid.is

Hér fyrir ofan er hægt að horfa á myndbandið við lagið Hey sæta sem er á plötunni.