Ísland veitir 18,5 milljónum til neyðaraðstoðar í austanverðri Afríku

Íslensk stjórnvöld hafa ákveðið að veita 18,5 milljónum króna til neyðaraðstoðar í austanverðri Afríku, að tillögu Össurar Skarphéðinssonar utanríkisráðherra sem hann kynnti á ríkisstjórnarfundi í morgun. Þetta kemur fram í tilkynningu frá utanríkisráðuneytinu.

Neyðarástand hefur skapast í austanverðri Afríku, einkanlega í Sómalíu, vegna hungursneyðar af völdum uppskerubrests í kjölfar þurrka og ófriðar. Sameinuðu þjóðirnar eiga í miklum erfiðleikum með að senda hjálpargögn til landsins þar sem vopnaðir hópar ráða stórum svæðum en talið er að um 11 milljónir manna á  þessum slóðum þurfi á neyðaraðstoð að halda.

Einn stærsti og hættulegasti skæruliðahópurinn hefur boðið takmarkaðan aðgang að því svæði sem hann ræður yfir, en Sameinuðu þjóðirnar segja að það sé hvergi nærri nóg.