Tún á Suðurlandi að verða eins og eyðimörk vegna þurrka

Tún á Suðurlandi eru farin að sviðna vegna þurrka. Bóndinn á Ósabakka á Skeiðum kveðst aldrei hafa upplifað annað eins og óttast að þurfa að fækka skepnum í vetur vegna heyskorts.

Eftir kalt og þurrt vor sunnanlands tóku við sól og hlýindi, en það var ekki endilega það sem hjónin á bænum Ósabakka á Skeiðum, þau Hildur Sigurðardóttir og Jökull Helgason, óskuðu sér helst í sumar. Hjá þeim eru túnin orðin gul vegna þurrka. Jökull segir að túnin séu að þorna upp, þau séu að verða eins og eyðimörk.

Þau glímdu einnig við þurrka í hitteðfyrra og sumarið þar áður en Jökull segir að ástandið nú sé mun verra, - og verra en hann hafi áður upplifað. Bóndinn er þó búinn að slá einu sinni. Uppskeran varð hins vegar aðeins um fjórðungur þess sem hann er vanur að fá í venjulegu ári. Hann hafi ekki getað beðið með slátt því annars molni heyið og bara hverfi ef það er ekki tekið.

Þarna háttar svo til að sandur er undir túnunum sem sogar í sig rakann en Jökull segir mýrartún standa sig betur þar sem þau haldi betur rakanum. Allar jarðir þarna séu þó þurrar. Sandurinn þoli þetta þó engan veginn.

Þau eru með um sextíu mjólkandi kýr og 230 kindur á fóðrum yfir vetrartímann. Nú stefnir í þau nái ekki að afla þeirra heyja sem þarf til að fóðra skepnurnar í vetur. Jökull óttast að þurfa að fækka í bústofninum og segist glíma við andvökunætur um hvernig eigi að bregðast við. Sumarið sé þó ekki búið og vonast hann nú til að fá rigningu á laugardag. Heitasta óskin er að fá alvöru sunnlenska rigingu, og minnst í eina til tvær vikur.

Hann segir þetta það langversta sem hann hafi séð og rifjar upp að mjög slæmt kalár og kalt vor hafi verið 1979. Síðan þá hafi ekki verið heyskortur á þessu svæði, eins og nú stefni í.