Milljarðatjón vegna hryðjuverkalaga

Tjón íslenskra fyrirtækja vegna þeirrar ákvörðunar breska stjórnvalda að beita hryðjuverkalögum gegn íslandi árið 2008 er talið nema um fimm milljörðum króna.

Þetta kemur fram í skýrslu sem gerð var fyrir fjármálaráðuneytið og birt á Alþingi í dag.

Við gerð skýrslunnar voru tekin viðtöl við stjórnendur tæplega fjörtíu fyrirtækja hér á landi. Hryðjuverkalögin urðu einnig til þess að erfiðlega gekk að koma greiðslum til og frá landinu og lentu skilvís íslensk fyrirtæki jafn vel í vanskilum vegna þessa. Innflutningsfyrirtæki fengu ekki lengur gjaldfresti hjá erlendum birgjum og voru krafin um fyrirframgreiðslur.

Að auki hafa íslensk fyrirtæki mætt tortryggni frá erlendum aðilum sem eru í mörgum tilfellum hikandi við að stunda viðskipti við íslensk fyrirtæki og vilja það í sumum tilfellum alls ekki, eins og segir í skýrslunni.

Í skýrslunni er jafnframt tekið fram að fyrirtækin sjálf segjast með engu móti geta metið eigið fjárhagslegt tjón af hryðjuverkalögunum þar sem erfitt sé að skilja það frá öðrum þáttum hrunsins. Ráðuneytið telur það engu að síður ljóst að beiting hryðjuverkalaganna hafði að sönnu áhrif á íslensk fyrirtæki, en þau hafi flest verið óbein.