Dópaðir slást við slökkviliðið

Slökkvilið höfuðborgarsvæðisins var kallað út að íbúð við Njálsgötu vegna eldsvoða um hádegisbil í dag. Einn slökkviliðsbíll var sendur á staðinn.

Þegar reykkafarar slökkviliðsins komu lentu þeir í átökum við íbúa hússins sem vildu varna slökkviliðinu inngöngu. Það þrátt fyrir að eldhús þeirra léki í ljósum logum. Reykkafararnir voru ekki lengi að yfirbuga íbúa hússins, þröngva sér inn og slökkva eldinn, sem hafði kviknað út frá eldhúshellu.

Lögreglan á höfuðborgarsvæðinu fékk hringingu vegna málsins þegar átökin stóðu. Þegar lögreglan mætti á staðinn hafði slökkviliðið ráðið niðurlögum eldsins. Í ljós kom að íbúar hússins voru undir áhrifum fíkniefna. Í íbúðinn fann lögregla margar tegundir efna, svo sem kannabis og hvít efni. „Bara alla flóruna," segir lögreglumaður á vakt.

Íbúarnir sem voru tveir voru fluttir á slysavarðstofu með grun um reykeitrun. Eftir skoðun kom í ljós að ekki var um alvarlega reykeitrun að ræða og þeir verða útskrifaðir af Slysadeild Landspítalans um fjögur leytið.

Þeir munu sæta ákæru vegna brota gegn fíkniefnalöggjöf.