Íslendingar flykkjast til Tælands

Á vef íslensku flugleitarinnar Dohop leita þúsundir manna að flugi á hverjum degi. Í gögnum Dohop er að finna áhugaverðar staðreyndir um ferðahegðun Íslendinga sem heimsækja vefinn.

Tíunda hvers mánaðar birtir fyrirtækið ferðavísa með tíu vinsælustu áfangastöðunum. Tæland komst efst á blað í sumar og hélt sætinu í allt haust.

„Bangkok vermdi efsta sætið frá því í sumar. Kaupmannahöfn komst í toppsætið í desember en engu að síður er augljóst að aukinn áhugi er á ferðum til Tælands. Bangkok féll einungis niður um tvö sæti. Aðrar borgir sem lenda ofarlega á lista eru London, Orlando, Ósló og New York sem kemur kannski ekki á óvart," segir Davíð Gunnarsson, sölu- og markaðsstjóri Dohop, og bendir á að sólin virðist auk þess heilla sem fyrr og eru strandbæir eins og Alicante og Las Palmas ofarlega á lista.

Dohop er íslenskt fyrirtæki sem rekur ferðaleitarvélina Dohop.is. Þar er hægt að finna flug, hótelgistingu og bílaleigubíla. „Sérstaða Dohop felst í því að leitin tengir saman flugleiðir sem eru annars ótengdar og sýnir ódýrar tengingar sem annars væri erfitt að finna," segir Davíð.

Hann segir flugleitarvélina, sem var stofnuð árið 2004, bera saman meira en 600 flugfélög og tugi ferðaskrifstofa á netinu.

Hægt er að leita beint í Dohop hér á Vísi en leitarvélin er meðal annars staðsett vinstra megin við íþróttahluta forsíðunnar.

„Dohop er dæmigerð flugleitarvél og virkar eins og Google," útskýrir Davíð.

„Hún finnur ódýr flug og vísar svo á aðra vefi þar sem hægt er að bóka. Hún er frábrugðin stórum vefjum eins og Expedia, ef við tökum hann sem dæmi, en hann nær aðeins til takmarkaðs fjölda flugfélaga og hótela. Við leitum hins vegar hjá eins mörgum flugfélögum og við getum.

Við höfum enga hagsmuni af því að sýna eitt flugfélag fram yfir annað, heldur sýnum öll flugfélög óháð því hvort þau borga okkur þóknun fyrir að vísa gestum til þeirra eða ekki. Við getum fundið tengingar á milli hefðbundinna flugfélaga eins og Lufthansa, British Airways og KLM við lággjaldafélög eins og EasyJet, Ryanair og Iceland Express en þannig er oft hægt að finna ódýrari leið en ella."

Davíð segir Dohop aðallega þekkt sem flugleitarvél en að á vefnum séu auk þess öflugar hótel- og bílaleitarvélar.

„Við gerðum nýverið samning við ástralska fyrirtækið Hotels Combined um rekstur hótelleitar á vef Dohop. Hotels Combined hefur um árabil verið leiðandi í þróun samanburðarleitarvélar fyrir hótel á vefnum en hún er sambærileg flugleit Dohop.

Við höfum látið þýða hótelleitarvélina á íslensku og sýnir hún verð frá þrjátíu söluaðilum um allan heim. Þar á meðal eru Hotels.com, Expedia, Booking.com og HRS. Hinn síðastnefndi er samstarfsaðili Icelandair þegar kemur að hótelbókunum en þar sem leitarvél Dohop ber verð HRS saman við 29 aðra söluaðila má áætla að við séum að bjóða hagstæðasta verðið hverju sinni."

vera@frettabladid.is