Himnesk frammistaða

Tónlistarkonan Ólöf Arnalds hefur fengið mjög góða dóma fyrir tónleika sína á menningarhátíðinni Sydney Festival sem haldin er í Ástralíu um þessar mundir.

Ólöf steig á svið á tónleikastaðnum The Famous Spiegeltent í garðinum Hyde Park og þótti standa sig einkar vel að mati blaðamanna The Sydney Morning Herald og The Daily Telegraph. „Með englarödd sinni og einföldum hljóðfæraleik virtist hún koma úr öðrum heimi. Þegar ég reyndi að smella mynd af henni uppi á sviði urðu til myndir sem höfðu yfir sér himneskan blæ,“ sagði í umsögn síðarnefnda blaðsins.

Auk þess að syngja eigin lög, flest á íslensku, söng Ólöf nokkur þekkt lög eftir aðra sem hittu rækilega í mark. Þar má nefna I"m On Fire með Bruce Springsteen og Solitary Man með Neil Diamond. Blaðamaður The Sidney Morning Herald taldi flutning hennar á síðarnefnda laginu þann besta á tónleikunum. „Hún söng lagið eins og hún hefði nýlega uppgötvað það og gæti þar af leiðandi tengst því tilfinningalegum böndum.“

Stutt er síðan Ólöf hitaði upp fyrir hljómsveitina Grinderman á tónleikum í Tasmaníu. Þar þótti hún eiga erfitt með að ná til fjöldans, öfugt við tónleikana á Sydney Festival. Ólöf hitaði upp fyrir hljómsveitina CocoRosie á tónleikum í hinu fræga óperuhúsi í Sydney í gærkvöldi. Í kvöld heldur hún svo tónleika í borginni Melbourne, sem verða hennar síðustu á tónleikaferðalaginu um Ástralíu. - fb

Hér fyrir ofan má sjá Ólöfu flytja lögin Crazy Car og Klara í upptökuveri útvarpsstöðvarinnar ABC Radio National í Sydney fyrir rúmri viku.