Aguero: Tevez-málið er skömm fyrir alla

Sergio Aguero segist vera mjög leiður yfir því að liðsfélagi hans og landi, Carlos Tevez, geti ekki náð sáttum við stjórann Roberto Mancini. Tevez neitaði að hlýða Mancini í Meistaradeildarleik á móti Bayern München í lok september og engin lausn er enn fundin í málinu.

„Því miður geta klúbburinn og Carlitos (Tevez) ekki fundið lausn í þessu máli og það er sárt fyrir mig að horfa upp á það. Það er mjög leiðinlegt fyrir mig sem bæði Argentínumaður og liðsfélagi hans," sagði Sergio Aguero en hann er nú staddur í heimalandinu þar sem argentínska landsliðið mætir Bólivíu og Kólumbíu í undankeppni HM 2014.

„Ég get samt ekki blandað mér í málið og farið að styðja annaðhvort Carlos eða klúbbinn því ég veit ekki hvað gerðist. Það eru bara þeir tveir sem vita hvað var í gangi en þetta mál er skömm fyrir alla," sagði Aguero.

Mancini segist vera tilbúinn að taka Carlos Tevez aftur inn í liðið ef leikmaður er tilbúinn að biðja hann afsökunnar en það virðist hinsvegar ekki vera á dagskránni hjá Tevez sem hefur ekki spilað með City-liðinu síðan í september.