Vegið að lögbundnu hlutverki grunnskóla

Frekari niðurskurður í grunnskólum Reykjavíkur gæti orðið til þess að þeir standist hvorki þær kröfur sem gerðar eru í grunnskólalögum né aðalnámsskrá. Þetta segir Guðrún Valdimarsdóttir, formaður Samtaka foreldra grunnskólabarna í Reykjavík (SAMFOK).

Þá segir Guðrún að sárlega hafi skort á samráð við fulltrúa foreldra í skólaráðum í þeim niðurskurðarhugmyndum sem menntasvið Reykjavíkur ætli skólastjórnendum að framfylgja.

Vísar hún til þess að tiltekið hafi verið sérstaklega á plöggum með niðurskurðartilmælum menntasviðs sem skólastjórar fengu fyrir helgi að foreldrar ættu ekki að sjá tölurnar.

 „Þetta er þriðja eða fjórða árið í röð sem skorið er niður,“ segir Guðrún og kveður SAMFOK lengi hafa mótmælt áætlunum um niður­skurð í skólunum. „Við erum löngu komin að sársaukamörkum.“ Guðrún segir SAMFOK hafa lagt áherslu á að fremur yrði skorið niður í yfirbyggingu eða öðrum þáttum þar sem hagræðingin bitnaði ekki á börnunum og kennslu þeirra.

„Þetta er ekki bara menntastofnun heldur þarf að sinna mörgum félagslegum þáttum líka. Þeim er varla verið að sinna í dag og verður alls ekki hægt ef skera á meira niður.“ Guðrún segir stöðuna nú þannig að fyrir dyrum sé skólastarf í Reykjavík sem samræmist hvorki lögum né aðalnámsskrá. SAMFOK fundar um málið með formönnum foreldrafélaga og fulltrúum foreldra í skólaráðum á Grand Hótel Reykjavík í hádeginu í dag. „Í foreldrum er mikill hiti og reiði og búið að vera lengi. En nú er gjörsamlega allt að springa.“

Oddný Sturludóttir, formaður menntaráðs Reykjavíkur, kannast ekki við að reynt hafi verið að halda upplýsingum um niðurskurð frá fulltrúum foreldra. Hún bendir á að tillögurnar hafi verið kynntar í skólaráðum fyrir helgi og þar eigi þeir fulltrúa. „Það er enginn vilji til að pukrast með neitt,“ segir hún.

Oddný segir hafa verið vitað að niðurskurðurinn yrði erfiður, en ekki liggi fyrir fyrr en í lok næsta mánaðar hvernig endanleg niðurstaða verði í hverjum skóla. „Nú stendur sú vinna yfir að fara yfir það með hverjum skólastjóra hvernig standa megi að málum þannig að bitni sem minnst á skólastarfinu sjálfu,“ segir hún og áréttar að grunnskólalög verði ekki brotin í Reykjavík.