Framhaldsskólar öllum opnir í haust

Öllum umsækjendum í framhaldsskóla, sem eru 25 ára og yngri og uppfylla inngönguskilyrði, verður tryggð skólavist næsta haust. Þetta kemur fram í drögum að aðgerðapakka sem ríkisstjórnin kynnti fyrir aðilum vinnumarkaðarins í gær og Fréttablaðið hefur undir höndum.

Í drögunum er einnig gert ráð fyrir því að þeim sem eldri eru sé „gefinn kostur á úrræðum í framhaldsfræðslu" og heildstætt fjarnám á framhaldsskólastigi verði í boði. Talið er að þessi úrræði og tengdar aðgerðir muni kosta ríkissjóð um 850 milljónir króna á ári.

Gissur Pétursson, forstjóri Vinnumálastofnunar, segir í samtali við Fréttablaðið að um afar þarft verkefni sé að ræða, enda sé gert ráð fyrir að úrræðið geti fjölgað námsfólki í framhaldsskólum og háskólum um eitt þúsund.

„Það er engin spurning að menntun er stór þáttur í uppbyggingu til framtíðar. Um sjötíu prósent þeirra ungmenna sem eru atvinnulaus nú eru bara með grunnskólapróf. Hugmyndin er að nota þessar menntastofnanir betur og opna fyrir þessum hópi til að koma einstaklingum aftur í nám."

Auk þessa gera drög stjórnvalda ráð fyrir því að starfstengdum úrræðum fyrir atvinnuleitendur verði fjölgað úr 1.500 í 3.000 á þessu ári, en það mun lækka útgjöld Vinnumálastofnunar um 400 milljónir króna vegna lægri bótagreiðslna.

Það er ekki síður mikilvægt úrræði að mati Gissurar.

„Það er fyrst og fremst vegna þess að starfstengd úrræði inni í fyrirtækjum eru einfaldlega langárangursríkasta úrræðið til að koma fólki af bótum og í vinnu."

Ofantalin úrræði einskorðast í bili við næsta skólaár, en til lengri tíma litið er gert ráð fyrir enn frekari aðgerðum til að efla menntun. Meðal annars verður nám í framhaldsfræðslu samræmt framhaldsskólanámi enn frekar, svo að framhaldsskólum verði hægara um vik að meta til eininga þá áfanga sem teknir eru í framhaldsfræðslu.

Þá verði leitast við að tryggja þeim sem hafa verið á vinnumarkaði framfærslu á meðan þau stunda nám, starfstengt nám verði eflt frekar og tryggt að það auki réttindi og bæti kjör fólks á vinnumarkaði.

Að sögn Gissurar verða úrræðin kynnt á næstu vikum og mánuðum.- þj / sjá síðu 16