Samhliða Icesave verði kosið til stjórnlagaþings

Eygló Harðardóttir, þingmaður Framsóknarflokksins, vill að samhliða þjóðaratkvæðagreiðslunni um nýju Icesave-samninganna fari fram kosningar til stjórnlagaþings. Líkt og áður hefur komið fram tilkynnti Ólafur Ragnar Grímsson, forseti Íslands, í dag að hann hefði ákveðið að vísa Icesave-frumvarpinu í þjóðaratkvæðagreiðslu.

„Nú skiptir öllu að þjóðin fái að kynna sér málið niður í kjölinn, kosti þess og galla að staðfesta ríkisábyrgðina og taki svo upplýsta ákvörðun í framhaldinu. Lýðræði virkar ekki án upplýsinga," segir Eygló í pistli á heimasíðu sinni. „Ég tel jafnframt að samhliða kosningum um Icesave ættum við að kjósa aftur til stjórnlagaþings."

Þá segir Eygló að ábyrgð fjölmiðla og annara lýðræðisafla sé mikil í aðdraganda þjóðaratkvæðagreiðslunnar. „Þá ábyrgð verður að axla af virðingu."

Kosning til stjórnlagaþings fór fram þann 27. nóvember 2010 en Hæstiréttur ógilti kosninguna í síðasta mánuði. Síðan þá hefur ríkt óvissa um stjórnlagaþingið. Undanfarnar vikur hefur nefnd með fulltrúum allra þingflokka verið að störfum en hún hefur ekki skilað niðurstöðum.