Þór Saari: Náðum ekki samkomulagi um stefnumál

„Þetta voru bara fyrst og fremst óformlegar viðræður fremur en samningaviðræður," segir Þór Saari, þingmaður Hreyfingarinnar um viðræður sem þingmenn flokksins áttu við forystumenn í ríkisstjórninni um samstarf við stjórnina.

Upplifir þú að ríkisstjórnin glími við vanda? „Það er greinilegt að þau búast við einhverri óvissu vegna fyrirhugaðra breytinga á ríkisstjórninni. Það getur varla verið neitt annað," segir Þór.

Hversu langt náðu þessar viðræður? „Þær fóru í að ræða tillögur fram og til baka og reyna að komast að samkomulagi um grundvöll til að starfa saman á, en hann náðist ekki."

Forystumenn í ríkisstjórninni tóku þátt í viðræðunum, en rætt var um að Hreyfingin myndi verja ríkisstjórnina vantrausti og styðja hana í ákveðnum málum, samkvæmt upplýsingum fréttastofunnar.

Komst þetta á það stig að rætt væri um ráðherrastóla? „Nei, við fórum aldrei í þetta með það í huga. Við erum bara þrjú og getum ekki misst þingmenn í embætti. Það var alveg skýrt hjá okkur að við værum ekki að sækjast eftir ráðherrastólum eða embættum eins og formennsku í nefndum eða forsæti þingsins. Við vildum bara koma ákveðnum málum í gegn, en þar má nefna róttækar lýðræðisumbætur, persónukjör, nýja stjórnarskrá. Og skuldavanda heimilanna, en það var kannski helst það sem þetta strandaði á," segir Þór sem lítur nú svo á að þessum viðræðum sé lokið.