Blanc: Hvernig getur Frakkland verið neðar en Grikkland og Noregur?

Laurent Blanc, þjálfari franska landsliðsins í fótbolta, gagnrýndi röðun þjóða í styrkleikaflokka fyrir dráttinn fyrir undankeppni HM 2014 í Brasilíu sem fram fór í gær. Frakkar voru í öðrum styrkleikaflokki og lentu í riðli með Heims- og Evrópumeisturum Spánar.

Frakkar hafa lengi verið í hópi bestu knattspyrnuþjóða heims, unnu Heimsmeistaratitilinn 1998 og komust alla leið í úrslitaleikinn 2006.

„Ég skil ekki af hverju Frakkland var öðrum styrkleikaflokki og af hverju Grikkland, Noregur og Króatía voru ofar," sagði Laurent Blanc við blaðamenn eftir dráttinn í Ríó í gær.

„Við lendum í því að mæta einu af bestu þjóðunum og endum á því að fá besta lið í heimi með okkur í riðil. Við áttum að vera í fyrsta styrkleikaflokki," sagði Blanc sem var strax byrjaður að tala um að það væri ekki svo slæmt fyrir franska liðið að ná öðru sætinu sem gæti gefið sæti í umspili.