Á þriðja tug kvartana sendar út

Flugmálastjórn hefur sent frá sér á þriðja tug ákvarðana á þessu ári vegna kvartana neytenda. Kvartanirnar snúast flestar um ágreining flugfarþega við flugfélög um skaðabótaskyldu vegna seinkunar eða aflýsingar, glataðs eða skemmds farangurs og upplýsingaskyldu flugrekanda til farþega. Þetta kemur fram í tilkynningu frá Neytendasamtökunum.

Lögum um loftferðir var breytt síðasta sumar, meðal annars til að efla neytendavernd laganna. Flugmálastjórn var veitt heimild til að úrskurða um ágreining á milli neytenda og flugrekenda. Stofnunin gefur út bindandi úrskurð sem flugrekanda er skylt að fara eftir. Þó er hægt að kæra ákvörðunina til innanríkisráðuneytisins innan þriggja mánaða.

Nokkrar ákvarðanir byggja á úrskurði Evrópudómstólsins frá árinu 2009, þar sem niðurstaðan var að ef flugi seinkaði um meira en þrjár klukkustundir ættu farþegar rétt á sömu skaðabótum og ef fluginu hefði verið aflýst.

Flugmálastjórn hefur ákvarðað kvartendum 400 evrur í skaðabætur í nokkrum málum þar sem þriggja tíma seinkun hefur orðið. Skaðabætur verða hærri eftir því sem flugtími er lengri.- sv