Pétur kemur heim í dag: „Hann er ótrúlega sterkur“

Pétur Kristján Guðmundsson, sem lenti í alvarlegu slysi í Austurríki um áramótin, kemur aftur til Íslands í dag. Hann hefur legið á sjúkrahúsi í Innsbruck frá því slysið varð en er nú á leið heim með flugvél Landhelgisgæslunnar. „Hann er ótrúlega sterkur," segir faðir Péturs, Guðmundur Geir Sigurðsson.

Löng endurhæfing

Pétur er væntanlegur til landsins síðdegis og verður hann þá fluttur í einangrun á Landspítalanum, eins og venja er þegar sjúklingar koma af sjúkrahúsum erlendis. Pétur á síðan fyrir höndum langa endurhæfingu á Grensás.

Læknar í Austurríki mátu meiðsl Péturs þannig að hann væri lamaður fyrir neðan mitti en hann hefur síðan fengið örlitla tilfinningu í fæturna. „Skaðinn er ekki algjör. Þetta gefur manni von," segir Guðmundur.

Pétur, sem er 24 ára gamall, var á göngu í fjallshlíð að fylgjast með flugeldasýningu í Innstbruck þegar honum skrikaði fótur og hann féll níu metra niður á harða stétt. Hann hlaut mænuskaða við slysið og er kominn í hjólastól.

Ástríða fyrir kvikmyndagerð

„Hann rennir sér ekki á snjóbretti aftur," segir Guðmundur en sonur hans var mikill snjóbrettakappi. Pétur er orkumikill með fjölbreytileg áhugamál og hefur hann síðustu ár verið að þreifa sig áfram við kvikmyndagerð. Hann setti á laggirnar lítið kvikmyndafyrirtæki, Trailerpark Studios, og hefur meðal annars komið að gerð auglýsingar fyrir Amnesty International.

Guðmundur segir Pétur bera sig ótrúlega vel miðað við aðstæður. „Hann ætlar ekkert að gefast upp. Hann er með skýra sýn á hvað hann ætlar að gera núna. Hann hefur gríðarlega ástríðu fyrir kvikmyndagerð og ætlar að halda henni áfram. Hann getur það alveg þó hann sé í hjólastól," segir Guðmundur.

Hann kemur sjálfur til Íslands með flugi síðdegis en í för með Pétri í sjúkrafluginu eru unnusta hans, móðir og tengdaforeldrar.



Tenglar:

Heimasíða kvikmyndafyrirtækisins Trailerpark Studios

Stuðningssíða Péturs á Facebook