Fjárveiting til HÍ í eðlilegum farvegi

Björn Valur Gíslason, þingmaður VG, segir aukafjárframlög til Háskóla Íslands og framkvæmd þeirra í fullkomlega eðlilegum farvegi. Hann segir engar ákvarðanir um útgjöld til þessa máls verða teknar nema með samþykki þingsins, enda annað andstætt lögum.

Eins og kunnugt er tilkynnti Jóhanna Sigurðardóttir í gær að Háskóli Íslands muni næstu fjögur árin hljóta aukafjárveitingu upp á 1,5 milljarð króna.

Kristján Þór Júlíusson gagnrýndi framkvæmd málsins í hádegisfréttum RÚV á þeim forsendum að ekkert kæmi fram í frumvarpi til fjárlaga næsta árs um fjárveitinguna.

Björn Valur segir vissulega rétt að útgjöldin hafi ekki komið fram í frumvarpi til fjárlaga næsta árs. Það komi hins vegar í hlut Alþingis að bæta þeim inn í fjárlögin.

„Í júní síðastliðnum skipaði þingið hóp til að vinna að tillögum um hvernig framkvæmd fjárveitingar til Háskólans verði næstu ár. Sá hópur hafi skilað af sér tillögum í gær," segir Björn. „Því gat fjármálaráðuneytið eðli máls samkvæmt ekki tekið tillögurnar með í fjárlagafrumvarpið."

Hins vegar er frumvarpið nú komið í meðfarir þingsins. Þingið mun því sjálft sjá um að bæta útgjöldum vegna fjárveitingarinnar inn í frumvarpið í samræmi við tillögur hópsins.

Alþingi samþykkti einnig í júní að 150 milljónir króna muni renna til Háskólans á þessu ári umfram fjárlög. Þau útgjöld munu koma fram í fjáraukalögum þessa árs sem lögð verða fram í næstu viku.

„Þannig er farvegur málsins allur í samræmi við fyrri ákvarðanir sjálfs þingsins," segir Björn. „Það er því útúrsnúningur hjá Kristjáni að halda því fram að fjármálaráðuneytið sé ekki að standa sig."