Gröfumaður lokaði óvart metan-afgreiðslustöðum

Gröfumaður sleit í sundur raflögn í gærdag sem varð til þess að viðskiptavinir bensínstöðvarinnar gátu ekki dælt metan eldsneyti á bíla sína. Í kjölfarið þurfti fyrirtækið að leggjast í lagfæringar til þess að opna metanstöðvarnar á ný.

Að sögn Hermanns Guðmundssonar var um óhapp að ræða og sagði hann í samtali við Vísi að það væri búið að laga bilunina og því gætu eigendur Metan bíla fyllt þá af eldsneyti á ný.

Hermann segir hinsvegar að bílaeigendur sem notast við metan-eldsneyti muni verða varir við talsverð óþægindi út vikuna vegna minni afkastagetu Sorpu. Hann segir að það muni lýsa sér í hægagangi.

„Það er auðvitað ekki heppilegt en ætti að vera komið í lag í lok vikunnar," segir Hermann.

Dælurnar eru annarsvegar á Bíldshöfða og svo er færanleg dæla í Hafnarfirði.