Skuldar 6,4 milljónir í dagsektir vegna Baldursgötu

Eigendur hússins við Baldursgötu 32 skulda Reykjavíkurborg nú 6,4 milljónir króna í dagsektir, samkvæmt upplýsingum frá byggingafulltrúa borgarinnar. Húsið hefur staðið autt í sex ár og er einungis brunarústir eftir að kveikt var í því árið 2008.

 

Baldursgata 34, sem er í eigu sama fyrirtækis, er nú að fara sömu leið, en búið er að negla þar fyrir alla glugga eftir að síðustu húsráðendur fluttu þaðan út. Vel yfir hundrað milljónir króna hvíla á lóðunum tveimur, að sögn Helga Gunnarssonar, forsvarsmanns Baldursgötu ehf. Hann segir kaupin á húsunum hafa verið verstu mistök sem hann hafi gert.

 

„Við keyptum húsin árið 2005 og næstu árin á eftir skiptist afar ört um meirihluta í borginni, þannig að skipulagsmálin byrjuðu alltaf upp á nýtt. Svo var allri uppbyggingu harðlega mótmælt af nágrönnunum,“ segir Helgi. „Pólitíkin á stóran þátt í því hvernig þetta var fyrst og svo kom bankahrunið strax á eftir.“

 

Varðandi Baldursgötu 34, sem hefur staðið auð í tæpan mánuð, segir Helgi að ekki hafi verið neitt annað hægt að gera en að loka húsinu. „Óreiðufólk braust inn í húsið og flutti þangað inn. Við létum einfaldlega hreinsa það út og lokuðum fyrir allt,“ segir hann. Helgi vill ekki tjá sig um framhaldið, en segir málin vera í vinnslu.

 

„Þetta er alveg skelfileg staða. Það eru mestu mistök sem við höfum gert að kaupa þessi hús,“ segir hann og bætir við að ef leysa eigi vandamálin sem fylgi niðurníddum húsum í miðborginni sé frekar letjandi en hvetjandi að beita fólk dagsektum. Borgin eigi að koma mun meira að þessum málum en hún hafi gert. „Pólitíkin ber sína ábyrgð, þó að við höfum sjálfsögðu líka gert mistök. Þetta byrjaði sem mjög góð hugmynd, en endaði alveg skelfilega.“

 

Hópur íbúa við Þórsgötu hefur sent Reykjavíkurborg bréf þar sem aðgerða er krafist vegna húsanna við Baldursgötu. Lilja Gunnarsdóttir, einn íbúanna, segir að þegar hús númer 34 hafi einnig lagst í eyði fyrr í mánuðinum hafi mælirinn orðið fullur.

 

„Við erum búin að vera þolinmóðir nágrannar í mörg ár, en þegar við sáum seinna húsið fara líka var okkur nóg boðið,“ segir hún. „Þetta er náttúrlega ekki boðlegt.“

 

Magnús Sædal, byggingafulltrúi Reykjavíkur, segir málin vera í vinnslu. Ekkert hafi verið ákveðið um aðgerðir að svo stöddu.

 

sunna@frettabladid.is