Guðmundur hittir Sigmund fyrir hádegi

Guðmundur Steingrímsson þingmaður hittir Sigmund Davíð Gunnlaugsson, formann Framsóknarflokksins, klukkan ellefu í dag þar sem hann mun segja sig formlega úr flokknum.

Guðmundur tilkynnti um ákvörðun sína um úrsögn í gær. Síðar í dag ætlar hann að gera nánari grein fyrir ákvörðun sinni en hann stefnir á að stofna nýjan stjórnmálaflokk á miðju stjórnmálanna.

Allir þingmenn Framsóknarflokksins sem fréttastofa náði tali af í gær sögðu að þeir hefðu ekki haft hugmynd um fyrirætlan Guðmundar.