Ekki Ginola að kenna heldur landamæraeftirlitinu

Emil Kostadinov, hetja Búlgara í undankeppni HM 1994, hefði að öllu eðlilegu ekki átt að spila lokaleikinn í riðlinum gegn Frökkum í París. Kostadinov var smyglað inn í landið ásamt liðsfélaga sínum þar sem þeir voru án vegabréfs.

Kostadinov skoraði bæði mörk Búlgara í sögufrægum 2-1 sigri á Frakklandi í lokaumferð undankeppninnar. Úrslitin þýddu að Búlgarar tryggðu sér sæti á HM í Bandaríkjunum á kostnað Frakka.

Gerard Houllier, þáverandi landsliðsþjálfari Frakka, kenndi David Ginola, leikmanni landsliðsins, um tapið. Ástæðan var sú að undir lok leiksins, í stöðunni 1-1, gaf Ginola fyrir í stað þess að halda boltanum út við hornfána. Búlgarar unnu boltann eftir misheppnuðu fyrirgjöfina, brunuðu í sókn þar sem Kostadinov skoraði líklega frægasta markið í sögu búlgarskrar knattspyrnu.

„Þetta hljómar eins og þjóðsaga, en hún er sönn,“ segir Zlatko Yankov um komu landsliðsins til Frakklands fyrir leikinn fræga árið 1993. Kostadinov og Luboslav Penev, sem átti stoðsendinguna í sigurmarki Kostadinovs, voru í vandræðum með vegabréf sín. Markvörðurinn Borislav Mihaylov og miðjumaðurinn Georgi Georgiev tóku málin í sínar hendur.

„Kostadinov og Penev laumuðu sér yfir landamæri Þýskalands og Frakklands í bifreið sem Georgiev ók. Þeir völdu vísvitandi landamæri þar sem gæsla var í lágmarki,“ segir Yankov sem man vel eftir leiknum í París. Hann deilir þeirri skoðun með Houllier að Ginola hafi gert mistök með að senda fyrir markið.

„Við biðum bara eftir flauti dómarans á þeim tímapunkti. Leikmenn og starfsfólkið á varamannabekknum töldu að ballið væri búið og að við gætum ekkert gert,“ segir Yankov.

„Ginola hefði getað gert betur, látið tímann renna út og þá hefði leiknum verið lokið. En hann taldi sig líklega geta unnið leikinn,“ segir Yankov sem man vel eftir vonbrigðum frönsku leikmannanna í leikslok. Frakkar þurftu eitt stig úr tveimur heimaleikjum gegn Ísrael og Búlgaríu en töpuðu báðum óvænt á lokamínútunum.

„Þeir litu skelfilega út í leikslok. Enginn trúði því sem gerst hafði. Ég man eftir andlitinu á Jean-Pierre Papin. Hann var svo fölur að það leit út fyrir að hann væri veikur,“ segir Yankov.