Eitt umferðarslys á dag

Samkvæmt bráðabirgðatölum lögreglunnar á höfuðborgarsvæðinu um umferðarslys varð um það bil eitt slys hvern dag ársins þar til í gær og eru slysin orðin 358. Tölur um fjölda slasaðra eða alvarleika liggur ekki fyrir en slasaðir eru nokkuð fleiri en fjöldi slysa segir til um. Í öllum tilvikum er um atvik að ræða þar sem vegfarendur þurfa læknisaðstoðar við í kjölfar umferðaróhapps. Meiðsli þeirra eru meðal annars tognanir, beinbrot, innvortis meiðsl, mænuskaðar og höfuðáverkar.

Það er mat lögreglu að hægt sé að koma í veg fyrir umferðarslys leggist allir á eitt um að aka gætilega og sýna tillitssemi í hvívetna. Á það skortir í allt of mörgum tilfellum. Til að freista þess að sýna fram á tengsl orsaka og afleiðinga að þessu leyti ætlar lögreglan á höfuðborgarsvæðinu að senda út tilkynningu tvisvar í viku með upplýsingum um þau umferðarslys sem hún kemur að. Þar mun koma fram hvar, hvenær og með hvaða hætti slysið varð, að hverju rannsókn lögreglu beinist, hversu margir slösuðust og eftir atvikum alvarleiki meiðslanna.

Lögreglan segir að um tilraunaverkefni sé að ræða. Það muni standa yfir í einn mánuð til að byrja með og hefst það 1. janúar. Tilkynningarnar verða sendar út á þriðjudögum og föstudögum.