Ókeypis hafragrautur og lýsi á morgnana

„Þegar fjármunir eru af skornum skammti skiptir máli að hugsa út fyrir rammann," segir Ragnheiður Linda Skúladóttir, forstöðurmaður Hringsjár sem er náms- og starfsendurhæfing fyrir fólk sem vill komast aftur út á vinnumarkaðinn eftir hlé vegna sjúkdóma, slysa eða annarra áfalla.

Starfsfólk Hringsjár varð vart við að margir nemendanna hvorki borðuðu morgunmat né tóku bætiefni og ákváðu að gera sitt til að bæta stöðuna.

„Morgunmaturinn skiptir sköpum og við fengum þá hugmynd að leita til Yggdrasils og Lýsis um samstarf," segir Ragnheiður.

Bæði fyrirtækin tóku vel í beiðni Hringsjár, Yggdrasill gaf lífrænt ræktað haframjöl og Lýsi hf. gaf lýsi fyrir nemendurna. Á vorönninni er því boðið upp á hafragraut og lýsi á hverjum morgni. Um 60 manns sækja Hringsjá daglega og um helmingur þeirra gæðir sér þar á staðgóðum morgunverði.

Starfsfólk Hringsjár lagði lífsstílskönnun fyrir nemendur sína nýverið þar sem meðal annars var spurt hvort þeir borðuðu morgunverð, hvernig þeir svæfu á nóttunni og hvernig þeim gengur að einbeita sér. Ætlunin er að leggja aðra könnun fyrir í lok annarinnar og bera niðurstöðurnar saman. Vonir eru bundnar við að hafragrauturinn og lýsið hafi jákvæð áhrif á nemendurna.

Meðalaldur nemenda hjá Hringsjá er um fertugt. Stór hluti þeirra lifir á endurhæfingarlífeyri eða fær fjárhagsaðstoð frá sveitarfélagi eða ríki. Því munar það miklu fyrir marga þeirra að fá morgunmatinn sér að kostnaðarlausu.

Tengill:

Vefsíða Hringsjár